فرح جوزي حكايات منال علي
جوزي خرج يجري من على المسرح وهو بيحاول يبان ثابت.
– “خير يا جماعة؟”
واحد من الرجالة فتح ملف قدامه وقال بهدوء:
– “حضرتك الأستاذ كريم؟”
– “أيوه.”
– “إحنا جايين بخصوص بلاغ مقدم ضد شركتكم، وفيه مستندات محتاجة مراجعة.”
وشه شحب. #حكايات_منــال_عـلـي
بصلي بسرعة… كأنه فهم كل حاجة.
قرب مني وهو بيكز على سنانه.
– “إنتي بلغتي عني؟”
بصيتله باستغراب.
– “أنا؟ لا.”
– “أومال مين؟”
ابتسمت ابتسامة صغيرة.
– “يمكن حد تاني اتخدع زيي.”
كان بيبصلي، لكنه لأول مرة مش قادر يقرأني.
الراجل كرر كلامه:
– “يا ريت تتفضل معانا.”
حماتي جريت عليهم.
– “في إيه؟ ابني راجل محترم!”
رد الموظف بكل هدوء:
– “إحنا مش بنتهم حد… إحنا بنراجع أوراق.”
لكن كريم كان عارف.
عارف إن في أوراق عمرها ما كان المفروض تظهر.
وفجأة…
رن موبايله.
بص للشاشة، واتوتر أكتر.
رد بسرعة.
– “ألو؟”
ومن الناحية التانية، صوت مديره المالي كان بيصرخ.
– “الحق يا كريم! الحسابات كلها متجمدة!”
– “إيه؟!”
– “والبنك وقف التحويلات… وفي مستثمرين انسحبوا بعد الأخبار اللي انتشرت.”
قفل المكالمة وهو مش مصدق.
في نفس اللحظة، موبايلات الناس كلها بدأت ترن.
واحد فتح موقع إخباري.
واحدة فتحت السوشيال ميديا.
والخبر كان بيتنشر بسرعة النار.
“رجل أعمال مشهور يثير الجدل بعد تداول أنباء عن زواجه الثاني قبل إنهاء زواجه الأول.”
الناس بقت تبصله بنظرات مختلفة.
من شوية كانوا بيصفقوله…
دلوقتي بقوا بيتجنبوا حتى السلام عليه.
العروسة كانت واقفة بعيد، بتعيط.
قربت منها.
ناولتها منديل.
قالت وهي منهارة:
– “أنا مكنتش أعرف.”
ربتّ على إيدها.
– “أنا عارفة.”
رفعت عينيها ليا.
– “إنتي مش زعلانة مني؟”
هزيت راسي.
– “اللي خدعني… خدعك إنتي كمان.”
أول مرة من ساعة ما دخلت القاعة، حسيت إن غضبي هدي.
لأن البنت دي كانت ضحية زيي.
لفيت أمشي.#حكايات_منــال_عـلـي
سمعت حماتي بتنده عليا.
– “استني يا سلمى… حقك علينا.”
وقفت ثواني.
دي أول مرة أسمع منها كلمة اعتذار.
بصتلها.
لقيت الست اللي كانت دايمًا شايفة نفسها، واقفة مكسورة.
قالت وهي بتبكي:
– “سامحينا.”
ابتسمت بهدوء.
– “أنا سامحت… لكن عمري ما هنسى.”
وسبتها ومشيت.
بعد أسبوع…
كنت قاعدة في مكتبي الجديد.